Ano Ba ¥en ?

Konnichiwa, mga kababayan!

Isang mapagpalang araw na naman po sa lahat. Kamusta na po tayo? Ramdam na ramdam po natin ang pagbaba ng halaga ng Yen ano po? At tinatayang mas bababa pa daw po ito hanggang bagong taon. Kaya mga kababayan, kailangan na yata nating maghigpit ng ating mga sinturon upang hindi natin masyado  maramdaman ang pagbaba ng halaga nito.

Dahil sa kaliwat-kanang kaguluhan sa ibang parte ng mundo at sa mga gulong kinakasangkutan ng ibat-ibang bansa ay patuloy na bumaba ang halaga ng bawat sentimo ng pera natin dito sa Japan laban sa dolyar ng Amerika at sa Piso ng Pilipinas, kung saan marami sa mga kababayan natin ang naniniwalang ito ay indikasyon na gumaganda na daw ang ekonomiya ng ating bansa. Kayo na po ang bahalang humusga kung ano ang tingin nyo sa bagay na ito. Ngunit ang patuloy na pagbaba ng halaga ng Yen ay ikinababahala na rin ng mga Hapon at habang isinusulat ko ang artikulong ito ay bumaba ng $1= ¥151, subalit makikita pa rin sa mga Hapon ang kanilang lakas ng loob at inisyatibong magpatuloy na magsumikap para sa kani-kanilang buhay at bansa. Kapansin-pansin ang pakikiisa ng mga mamamayan sa pakikipaglaban upang umangat ang ekonomiya ng bansang Japan. Kung kaya kahit nag-aalala ay mas nananaig pa rin ang tiwala ng mga mamamayan na makakabawi din ang bansa at muling sisigla ang palitan ng Yen laban sa Dolyar. Sinisigurado ng mga nasa Gobyernong Hapon bago natin maramdaman ang sobrang paghihirap ay nagawa na rin nila ang lahat ng kanilang makakaya upang maibsan ang bigat na maipapasa sa mga mamamayan dito.

Kasabay nito ay nalalapit na naman ang Pasko. Hindi lahat ay masaya dahil kanya-kanya naman tayo ng mga ganap sa buhay. Lalo pa at katatapos lang nga BSKE o eleksyon sa bansa natin. May mga pinalad at may mga nabigo. Bago mag bagong-taon ay uupo na din ang mga bagong halal kung saan muli na naman mapapatunayan ang kani-kanilang totoong layunin sa pagpasok sa pulitika.

Sa kabilang dako ay lumipad ang Prime Minister Fumio Kishida tungo sa ating bansa upang pagtibayin ang samahan at ang siguridad ng ating bansa laban sa usaping isla ng Pag-asa o Scarborough Shaol. Di naman kaila sa atin ang matagal na usapin ukol dito. Umaasang muling sisigla at humigpit ang samahan ng ating bansang Pilipinas at Japan. Marami na ring proyekto o tulong ipinaabot ang Japan mula pa noon at kung mapapansin natin ay marami din ang nagbobolunrtaryong mga Hapon upang magbigay ng tulong sa mga kababayan natin. Nawa, ang pagdalaw ni PM Kishida ay may malaking impak sa pagbaba ng palitan ng Yen nang sa gayun ay sumigla ang Pasko nating lahat.

Isang paalaala lamang po na ano man ang mangyayari ay nasa sa atin pa rin kung paano natin haharapin ang bawat umaga na dumarating sa atin. Kanya-kanya pa rin tayo ng mga diskarte upang makalagpasan ang hamon ng bawat araw na lilipas. At may kanya-kaya tayong pamamaraan at kaligayahan sa buhay.

At sa Paskong darating nais ko po kayong batiin ng “Maligayang Pasko at Masigla at Masaganang Bagong Taon po sa lahat!

Hanggang sa muli.

Tunay Na Pag-ibig

Minsan lang dumarating

Tunay na pag-ibig sa’tin

Dahil marami na ding nagpapa-alipin

Nag-aalay ng huwad na damdamin

Maraming mapagpanggap

Panloloko dito ay laganap

Tunay na pag-ibig ay mailap

Masakit, minsan ay kay saklap

Lagi tayong nakakalimot

Sa Diyos pag-ibig walang pag-iimbot

Kaya sa paskong darating

Tunay na pag-ibig ibahagi natin

Sa anumang paraan

Na ating makakayanan

Gumawa tayo ng mabuti

Upang ang Diyos sa’tin nakangiti

At bilang ating ganti

Pag-ibig ating ibahagi

Di lamang sa paskong darating

Kundi sa bawat umagang ating pag gising

Konnichiwa, mga kababayan!

Isang mapagpalang araw sa lahat mga kaangkas!

Muli na naman tayong magkakasama para sa aming mga munting kakayahan at nawa ay maging bahagi sa isa na naman ninyong napaka-abalang araw. Nais ko lamang ibahagi ang ilang mga bagay na nalaman ko na maaring alam nyo na rin. Ngunit dahil sa abala ang ilan sa atin at ang iba naman ay kahit alam na ay hindi na binigyan pansin hanggang sa nakalimutan na ito. Marami malamang ang tulad ko na ngayon lang din lubos na nalaman ang sistema, estado o ang pagkakaiba ng Regular, Full time, Arubaito, Part-time at Trainee dito.

Una, alam mo ba kabayan na malaki ang nagawa o tulong ng pag-aaral ko sa JICE Shigoto no Tame no Nihonggo? Dahil noong pinasulat ako ng rirekisho o bio-data sa oras mismo ng pag-aapply at sa harap ng mag-iinterview ay maayos kong naisulat ang mga kinakailangan pati ang natutunan kong mga kanji na aminin man ng iba o hindi karamihan ay ang mga asawa nila ang nagsusulat o nag fill-up ng mga ito. Kauna-unahan akong Pinay na natanggap sa kumpanya. At sa loob ng kalahating taon ay naging regular (seishain) at ginawa nila akong Supervisor o Tantosha. Kung saan hindi na ako basta-basta matanggal unless may gagawin akong masama. Salamat sa tiwala nila, salamat sa Hellowork na nagbibigay prebilihiyong makapag-aral at matuto ng libre ng mga tamang paggamit o ginagamit na Nihonggo sa pagtatrabaho at higit sa lahat sa Diyos na nagbigay ng  pagkakataong kagaya nito.

Alam nyo po ba na karamihan sa atin dito ay nasa part-time or arubaito? Isa sa mga dahilan ay ang Fuyo Kazoku ng mga asawa at may karampatang halaga lamang na dapat nating kitain sa loob ng isang taon. Ang iba naman sa atin ay may iba pang trabaho at bilang pandagdag kita ay nag aarubaito at alam nyo na po ang aking ibig sabihin.

Alam nyo po ba na hindi din basta-basta ang maregular sa trabaho dito at may mga benepisyo silang naibibigay yun nga lamang ay kinakailangan din tapatan ito ng pagtatrabaho. Kailangan natin ang sipag, pasensya, tiyaga at dedikasyon. Kapalit naman ng mga ito ay ang magandang benepisyong babalik sa atin kapag tayo ay magkakaedad na o sa oras na magretiro na tayo. Higit sa lahat ay tuloy-tuloy ito hanggang sa tayo ay lumisan sa mundong ito na mapapakinabangan ng maayos ang ating pinaghirapan dito. Pwede tayong mamili kung dito ba o sa Pilipinas tayo mamumuhay nang medyo makakaluwag-luwag dahil benepisyong makukuha natin mula dito sa Japan.

Alam mo ba na ang maging kaishain ay isa sa pinakamahirap at masarap maging dito sa Japan? Pinakamahirap dahil halos buong oras at buhay mo ay dapat mong ituon sa kumpanya mo. Mas mahaba ang oras ng pagtatrabaho at minsan pwede pang walang uwian depende sa mga sitwasyon ng kumpanya. Masarap dahil sa maliban sa benepisyong pwede nating makuha pagtanda ay may bonus at depende din ito sa laki ng kumpanya at may mga extra-ordinary pang holiday at hindi ito basta-basta dahil nag a-out of town sila at yung iba sa abroad pa na libre ng kumpanya, na hindi natin mararanasan kung arubaito lang tayo.

Alam mo din ba kabayan na ang mga kumpanya dito sa Japan ay maaaring tumanggap ng mga “special” or down syndrome na mga tao at tinuturing itong normal dito? Katulad natin ay may sweldo din sila at sa pagkakaalam ko ito ay kahati ng kumpanya ang gobyerno para dito. Hindi rin pwedeng tanggihan ang mga katulad nila upang magtrabaho.

Ang intern basically alam natin yan, pero mayroon ding tinatawag na trainee at marami sa ating mga kababayan ang pasok dito. Marami din ang mga galing sa ibang bansa gaya ng Vietnam, China, Indonesia, Thailand, India at iba. Sila ay madalas nating makikita sa mga factories, ospital bilang kaigo o caregiver, sa gemba o mga construction sites at sa mga farms upang maging taga pitas ng gulay o prutas. Sila ay madalas na nakakontrata ng 3 taon lamang at nakadepende pa rin sa kanila o sa kanilang kumpanya kung sila ay papauwiin o magtatagal.

Kaya sa katulad nating may permanent resident visa ay maituturing tayong lahat ay ipinagpala. Kung kaya laban lang ng laban habang nandito tayo sa Japan mga kababayan. Hanggat kaya nating magtrabaho at makaipon para sa ating kinabukasan at para sa mga mahal natin sa buhay. Dahil aminin man natin o hindi ay mas masarap pa ring mamuhay sa bansa natin kasama ang ating mga mahal na pamilya.

Hanggang sa muli. Pagpalain nawa tayong lahat.

Laban Japan

Isang biyaya na tayo ay nasa Japan

Dito may pagkakataon tayong yumaman

Basta’t ikaw ay masipag at mapagkakatiwalaan

At hinding-hindi gagawa ng anumang kalokohan

Respeto sa isa’t-isa atin itong ramdam

At buhay ng iba ay hindi pinakikialaman

Halos lahat ay abala sa kanilang pinagkikitaan

At minamahal ang kanilang mga kabuhayan

Laban Japan para sa ating mga mahal sa buhay

Sa Pilipinas na hindi pinalad magtagumpay

Na tayo ang kanilang takbuhan at alalay

Kung sila ay nawawalan ng pag-asa at nalulumbay

Laban Japan at ating ipagpatuloy

Mga natutunan at aral na ating naging gabay

Upang tayo dito ay tumagal mamuhay

Sa bansang punong-puno ng kulay, sigla at buhay